路從哪裡走出來?

這幅圖好正。
正點在於讓我們明白現實。
我們沒有富爸爸,所以要努力讓自己成為富爸爸。
就是為了不給子女添負擔,就算沒有benz載著走,赤腳也不用跑得這麼苦。

一雙小朋友

一星期前,我家養了一雙不是從我肚子裡冒出來的小朋友。

難怪很多人養貓之後,都不肯再養小朋友。雖然養兩頭小貓的開支跟養一個小小孩沒大分別,但起碼小小貓真的讓你享受到天倫之樂之餘,你不用怕他小時吸煙吸毒,大時沒錢買樓要訓街。

兩頭小東西的感情很好,經常堆在一起睡,不過一講到食就失感情,餵糧時都係打架收場,有兩隻貓碟都無用。

貓是從香港群貓會帶回來的,好多手續,又要裝窗網又要家訪,但我們也得到好多養貓的寶貴意見,加上交$1100已包兩支防疫針、絕育費和會費,比SCPA和自己帶他們去打針絕育便宜喇。

好想帶他們去探uncle mao,即是仍身在外家的陳貓,但陳貓天性善妒,簡直生貓勿近,唉~

狗狗和竹戰

整個新年假期最開心既,都係呢幾日^^

首先係見到同事Duncan隻狗仔,話係狗仔真係言過其實,有無見過40幾磅既狗仔?!不過聽聞一隻金毛尋回犬真係閒閒地都五六十磅喎~

話晒係第一年派利是,狗狗都算係仔仔丫,加上著到鬼死咁拜年look,所以我將原本某封畀同事既利是都派左畀狗狗。好可惜,之後有其他怕狗既同事返黎,Duncan未婚妻就帶走左佢lu~

到我臨走時,某遲到又老實不客氣既同事(XDDD)問我拎利是,我就同佢講我將佢果封畀左狗狗喇。實情係我趕住返屋企打牌,費事再o係袋入面拎利是畀佢喇,鬼叫佢遲黎之餘,仲要怕狗,搞到我無得玩狗~~~可惡呀~~~吼)))))))))))))))

返到屋企,即刻一坐低就打,拜年都慳返。新年發個新年財, Albert即刻拎左個雙響炮頭彩,畀bear同阿雪響中左,我就繼續陪打。以我既性格,通常都係少出沖輸自摸,寧願繼續踩單車都唔想去搏摩托。十次有九次都係輸兩家,但係今年竟然有新突破喎~!

唔係一家輸三家呀!!!

而係一家贏三家呀!!!

勁唔勁先?!打左12圈,我有7局係自摸呀,8局人地出沖,其餘都係睇住三家互相廝殺。真係睇都開心呀,哈哈哈~

4點幾打到2點幾,終於完左12圈,發完開心新年財,贏左300幾蚊,填返少少利是數啦~臨尾研究主場係咪真係有利贏錢,可能係啦,起碼自己屋企既話,唔使掛住點返去嘛~

祝大家新一年賺多d,日日都開心d~

漏夜趕科場

的起心肝開始報SEN,其實由實習開始,已經有轉行打算,只不過自己懶,拖下一年拖下又一年,都無實際行動去實踐準備轉行的"大計"。

不過今年好了,因為有舊同事Agnese讀了一年,亦表明一定要踢我入去陪讀,所以老早就send了email來催我報,加上現在屋企有fax機,再加上入了學校做,應該會有人願意替我寫推薦信...等等這些"有利"因素,分分鐘今年有得讀書之餘,可能還要搬返出市區....諗起都好煩呀...吼))))))))))))))

其實我不喜歡讀書,讀完又如何?! 首先一定賺不回學費,又要犧牲時間(無得睇閒書事大呀),生仔大計更加要推遲(99同阿媽一定會更加發癲去催我),最重要是,我真係無心機讀書呀!這個才是最重的重點喎....唉~

等我仲想買部洪金寶返黎玩添...買左都無時間玩啦...蹝氣~

PC9同你共慶歡樂年年~

新正頭,今年係成為C9後第一個年,所以好大堆頭又好忙咁預備一大堆賀年食品。(會唔會根本係自己想食,扮晒野又話過年要食賀年野,華麗園咪就係一大好例子囉)

因為過年前太忙,連全盒都無時間買,結果年三十晚食團年飯前才買到個全盒。好彩之前醒目,問定阿媽拎瓜子,糖蓮子同埋大吉這些自己不吃但又一定要存在的東西,否則就更麻煩,人家都歲晚收爐了,在哪裡找得到呢?

話時話,這些年來,都學不懂吃瓜子,更不明白幾十蚊斤的瓜子有什麼好吃?連殼一齊吃的嗎?!

蘿蔔糕是自家弄的,總覺得那些只有胡椒粉味和一團粉的所謂蘿蔔糕,是應該在大X樂或大X活之類的快餐店吃早餐時才會吃到,而不會在家中出現。情況就好像你不會在家見到有女人在眼皮上黏著一條蜈蚣,然後塗藍色眼影走來走去一樣,因為這些人,只會在尖咀的大X豪附近才見到嘛~(夠了喇PC9你的九唔搭八!!!)

發神經地年廿二就去買華麗園,食到今天還在吃,但身懷大量椰汁的它到現在依然未變壞,嗯...看來它的防腐劑實在拍得住法老王...而且極之大件wor...像我們這些唔黐家又獨家村的兩公婆,分分鐘要食到年宵wor...仲要一日起碼有一餐都食先得,有人可以救救我嗎?!

還是下年買一底和阿媽對分?!

不如下年什麼都不要買,去避年算了~

凱旋回歸

那個濕碎野奇多,但效果又真係奇大既中一camp已經搞掂去埋返黎得左。(拍手掌喇喂~~~~)

小朋友真係好可愛,但估唔到有咁多咁死要面既小朋友,其實佢地內裡都仲係一個可愛既小朋友,但因為實在太老積。(無辦法,都係迎合市場需要je,你睇萬寧妹妹幾受歡迎就知)
結果到左十二三歲,佢地既心態已經好似中年人咁執著要面小氣斤斤計較乜都齊。d阿爸阿媽仲以為阿仔好醒識計數唔會畀人蝦,實情係小朋友無晒童真,唔再可愛之餘,父母仲一定要保障自己,因為咁細個就識計數,大個又點會無條件地孝順你先?!

又要小朋友識計算,但又想佢地唔算自己,呢d父母既想法真係奇突兼低能。

用計數角度,搞呢d camp用咁多manpower同時間,實在好唔抵。但我既角度係救得一個得一個,去60個有1個成功,我已經當食左糊。何況今次係叫雙飛,真在令我好高興~

希望可以keep得住,唔好聽完就算。

題外話,我曬燶左,要日日返屋企倒模,加埋早上要化妝返工先可以見得人。但好可惜,我camp完除左呃1日病假(實在太攰又喉嚨痛呀)之外,每日都差唔多做到11:00先返到屋企,塞左d衫入洗衣機或者煲水第日飲之後,都已經要訓覺。所以我無時間理塊面喇,朝早化妝就得,黃面婆就係咁黎既~!