給我最愛的babybear 4

babybear,

最近發生在日本的大地震,遠在香港的媽媽每天都從報紙感受到當中的威力。不是震到來香港,而是每天荒謬絕倫的新聞--盲搶鹽、自我踢爆、棄子...

媽媽這才知道,原來身為中國人的首要宗旨是"人為財死"和"大難臨頭各自飛"。

問十個有九個去搶購食鹽的人,為什麼要搶? 沒有人會答你"驚遲d無鹽食", 大部份的答案都是"怕d鹽之後會貴"、"遲d可能有得炒"、"人搶我咪搶囉"...除了無知,還很貪心,而且低B。因為大家都明白,香港人只有食得太好太咸,從來不會因缺鹽而導致生命危險。反而今趟只是怕蝕底,連"擴輻射"的鹽焗雞也照搶可也。

繼盲搶鹽之後,大大小小的日本食店也因為大家怕了日本輻射而門可羅雀,為了挽回生意,就紛紛鬼拍後尾枕,大大聲道出真相--原來一直以來,日本食店也只是賣concept,即是店員穿套和服跟你用日語打招呼、用中日文夾雜的餐牌、推出連名字也讀不來的魚...只為了營造氣氛,讓客人誤以為自己有一刻到了日本享受美食,但實情是檯上的食物,無一出自日本。

香港人並不笨,又怎會不知道只付出十元八塊,哪能享受到真正的日本美食呢? 只不過一路以來心照不宣,漸漸就會夢想謊言變成真。突然有人紛紛自我踢爆,大家不甘心美麗的糖衣突然被撕開,於是又不甘後人地表示抵制那些"忽然誠實"的食店,恐怕踩少兩腳又會蝕底了。

我想,如果有朝一日你做錯了事,媽媽是不是要做第一個把你打進天牢,讓你永不翻身的人,才可顯示出媽媽有多公正無私,誠實正義? 又或者為了自保,而把你遺棄,免得自己會被人鬧埋一份?

假如你做錯了,媽媽並不是超人,除了懂得教你認錯,教你不要一錯再錯之外,其他的我都不懂。只能夠陪著你一路經歷,總之媽媽是無論如何不會扔下你的。

祝 不要激親媽媽 以免媽媽推你出街訓天橋底執紙皮

mothercat

BB care- 產前爸媽課程

上左第一堂產前課程...

現場環境極之擠迫,連擺袋既地方都無,仲要加埋十幾個大肚婆,同埋十幾個肥佬(唔知點解現場一個瘦d既準爸爸都無),空氣又唔流通,連張凳都坐得極之唔舒服...

由一位註冊護士主講,悶到抽筋,講野得佢自己笑,其他人都無反應...內容都幾公式,即係睇書都會學到,又無乜實際經驗同我地分享...所以到左半堂左右,大家都開始陸陸續續去廁所...

花左成15分鐘勸大家儲臍帶血,好大的廣告成份...

教執走佬袋,基本上佢只係將一個預備好既袋倒出來畀大家睇一次,我諗都係睇新手媽媽既blog會好d,分分鐘仲詳盡...

最後得返5分鐘畀大家學換片,但無教抹pat pat,只係叫大家記得"new"返片入面條防漏出黎,跟住就叫大家走...

bear話好浪費時間,我深感同意,不過我唔會畀佢走堂既,因為學費貴,同埋護士姨姨不斷強調"老公要服侍下大肚既老婆",等人幫佢洗下腦都好。

Babyplus胎教機

據朋友仔Fido的表哥(?!)所講,呢部胎教機對穩定BB既情緒係非常有幫助,所以就買來試下。(不過我無問Fido信唔信佢表哥XDDDD)

不過部機原價咁貴($1880),梗係去YAHOO睇下先啦,二手價大約$900-$980,如果真係出到來係易湊D既,咁又算好貴,用$1000去訓個靚覺,唔好話貴,簡直係抵啦~

其實都係D有節奏既boom boom聲,由18周開始聽,由快到慢。咁即係話,以前無呢部機既時候,住地盤隔離果d小朋友,應該會聰明d,脾氣好d...

給我最愛的babybear 3

Babybear,

終於可以名正言順的叫你babybear了,因為醫生清清楚楚看到你的慈菇椗。

在這段日子,媽媽除了暗暗盼望你是男孩子外,原來隔著肚皮,也可感受到你的性別,你令媽媽終於明白,為什麼當媽的總愛對著孩子說「你扢起條尾我就知你想點」,因為母親的確和子女有點和爸爸感受不到的心靈感應。

媽媽從小到大都渴望擁有一道濃眉和一頭烏黑的頭髮,可惜偏偏「你想果樣就係無果樣」,但自從有了你,媽媽看著眼眉一天比一天深色,就覺得特別興奮。現在更希望你有一對順眼而適中的眼眉,還了媽媽的心願。

當然,比起眼眉,還有更重要的事情。不過媽媽不想給你太大壓力,現在你只需要在肚內好好游泳和睡覺就好了。

祝 睡覺時少流口水,減輕媽媽肚子的負擔

mothercat

派錢

「每個18歲以上既香港永久居民」都有得獲派6000蚊呢個消息一出,李澤楷同梁洛施即刻收左皮~!

放工時o係巴士上聽到乘客熱烈討論,其中一個中年港男話,發達喇今次,如果今年真係派6000蚊,以後實會年年都派,唔派果屆,一定畀人打!就算佢唔怕畀人打,佢都怕d人又上街啦,到時咪又照派...

之後回應佢果個,係坐隔離搭訕既阿姐,即時問未住夠7年有無得派,虛齡(?!)18歲又有無得派,同埋拎綜援出左雙糧仲有無得派,當知道頭兩樣都無,最後果樣就唔知,就即刻一大串粗口,內容大致都係話人歧視佢之類。其實佢講得無錯,因為就算財爺唔歧視佢,成車人已經即刻鄙視佢。

返到屋企,問上工無耐既家務助理姐姐,財爺派6000蚊,你會唔會唔做架?姐姐即刻話,得果6000蚊,都唔夠我飲1個月茶(!!!)我而家做野都係打發時間咋,橫掂你呢度又唔污糟,係亂左d je...(阿姐開始燒到我果疊,所以我即時stop左個話題)

開facebook,見到d學生話收到6000蚊既話,一係會去旅行,一係會買i phone,問佢地會唔會請阿爸阿媽食餐勁,大家當我透明。只係得到一個回應,就係「如果得阿爸阿媽拎到錢,佢地都唔會請我食啦!佢地連我平時d書簿津貼都拎埋,然後要我買舊書,借我過橋借左十幾年,乜都還晒啦」明晒...有咩質素既父母,就有咩質素既仔女...咁都合理既...(係咪我蠢呢?!我阿爸阿媽都係咁呃我d書簿津貼十幾年喎,但我拎左6000蚊既話,又真係想同佢地去下旅行...)

老公返屋企,同佢講有得派6000蚊,叫佢拿拿聲每個月加家用,或者選擇全數上繳中央。佢前所未有地咁醒,「你估今日拎左6000蚊,你以後唔使還返呀? 還凸添呀,交稅都交死你,做12個月野出11個月糧,到時咪拎你d錢去補貼d大懶虫,人地拎綜援出雙糧,仲有得全家大竇夾埋拎幾皮野,不如而家我地一齊唔撈,去拎綜援仲好,最多你做申請人,d錢入晒你戶口囉!」

即係咁,派錢既得益者,除左財爺,綜援人士同旅行社之外,其實d錢大部份會去左幫喬布斯籌錢醫cancer,咁都算係做善事既...分分鐘仲促進埋世界人口增長,因為d男人有錢就返大陸滾,滾完生多件又帶佢落香港攞錢...

不過佢地都唔夠直接得益,最快得到眼前利益既又係偉大的誠哥,因為終於無人追問佢果3粒孫,同埋究竟分手係咪真係因為同古天樂有路...

廿八方、產前爸媽課程、托腹帶、肚紋膏

作為一個新手上路的媽媽,我實在懶得無可再懶。到現時為止,我只係睇左好幾個媽媽的blog,睇下人地用左d乜野好用既東東咁大把。

廿八方: 聽朋友講的,話bbcare果度賣3000幾蚊,太貴,所以的起心肝去搵下條藥方,發現入面除左人蔘同鹿茸,其他都唔係好值錢既藥材,問過阿媽之後,決定叫阿媽去執。慳返既錢,阿媽話可以買d更靚既蔘

產前爸媽課程: 係睇找點事幹,之後再發現大部份作為新手爸媽既朋友都係呢間上course,寄左cheque去,等3月頭開班,但到而家都無回音收唔收我讀

托腹帶: 事前聽都無聽過,反而係bear返工時經過商場見到,之後帶我去揀。但原來無乜得揀,來來去去都係六甲村同埋另一隻日本牌子,荃灣babydaily買$150,做會員平左15蚊,非會員價係$165。之後睇到jusco都有得賣,但就$165。唔知係咪我得3個月多d,個肚未夠大,暫時覺得唔係好有用。

肚紋膏: 最初經facial師介紹,佢話搽玫瑰果油好過搽膏,於是去彩豐行買左支玫瑰果油,沖涼後未抹乾身時搽,效果ok,但d油既味好難聞。最後頂唔順都係去卓悅買左支Palmer's,方便d,搽果時又唔怕成身水會冷親,仲可以同阿b傾下計。而家兩樣都用,搽埋大脾同腳。

給我最愛的babybear 2

babybear,

不知你在做什麼呢? 游水還是玩手指?

最近很多成年人都好瘋狂地用電話打咭,他們平時對打咭這個制度是深惡痛絕的--不過只限於返工。現在他們愛上的,只是facebook內的打咭遊戲,目的只為讓朋友知道,自己身在何方,做些什麼。再深一層的目的,恐怕就是讓人羨慕或妒忌一下--你在上班嗎? 我在high tea/蛇王/去旅行/訓晏覺...

對於這種近跡露體狂的行為,媽媽實在不希望你會做。我會十分願意你跟我分享生活細節,但如果你長大後,每小時也致電給我,我想我一定會改電話去避你。因為你爸爸每天從來都不會在無事問的情況下打超過三個電話給我,所以你都不要期望,我會因為你而改變哦。因為媽媽不會相信,掌握你的行蹤就等於關心你,那極其量只是操控,而你也會有反感的一天。熱面孔貼冷屁股是很難堪的,你媽面皮很薄,所以寧願在你有需要時才出手,也好過事事管。

祝 珍惜自由,不要無什麼就想要什麼

mothercat

給我最愛的叉燒

叉燒,

為什麼媽媽要叫你叉燒?

因為人人都話「生舊叉燒好過生你」,咁,叉燒即係最好啦
如果媽媽生到一舊人見人愛的叉燒也不錯,至少可以食左你

祝 車見車載,幫我慳油錢

媽媽上

大肚之謎

大肚婆有好多野唔做得唔食得,個個人都言之鑿鑿好有道理咁,但可信性究竟有幾高呢?

1. 未過三個月唔講得畀人知

***但講得畀老細知,老細又會將未來既工作安排畀其他人做,除非其他人係傻仔又或者老細寧願犯法都堅持要呢段期間炒你je,否則咪一樣會通晒天,你唔講都唔得啦!

***仲有wo,人係指邊個先?父母老爺奶奶果d又算唔算?唔當佢地係人又驚畀雷劈,當佢地係人又會違反呢個原則,咁究竟講唔講得呢?

2. 唔食得羊同蛇,魚生,咖哩

***咁蒙古人、日本人、泰國人同印度人點算?

3. 唔可以去飲或者出席其他喜慶場合

***做白事就話怕傷心過度je,紅事都唔得?!驚開心得滯呀?!

做人難,做大肚婆仲難,仲要捱多一個月先可以通天呀...點算...

失蹤人口

通常一個男人失蹤,不外乎兩件事,一係好忙一係好霉
通常一個女人失蹤,都不外乎兩件事,一係拍拖,一係生仔

拍拖暫時無我份~hahahaha

好一單笑料

相信大家不會忘記這個廣告吧~!
近日古天樂的<一路有你>準備上畫,據聞戲中以普通話作對白,而古天樂的普通話,更成為此戲的其中一個賣點。

--

莫文蔚懶理馮德倫甩拖 古仔搞笑普通話開正戲路


(星島)2011年1月5日 星期三 06:30
(星島日報 報道)前晚電影《一路有你》於銅鑼灣 時代廣場UA舉行首映禮，主要演員古天樂 、莫文蔚 、黃奕、監製爾冬陞及導演趙崇基等均有出席。普通話不靈光的古仔，在戲中面對不少普通話對白。對此，黃奕表示對古仔的好學而感動，但莫文蔚就笑指他飾演一名中港貨車司機，實在最適合不過。
　　古天樂表示戲中兩場打鬥令他十分難忘，其中一場更受了輕傷。談到黃奕提到被他對普通話的好學而為之感動。古仔坦言對白不是母語，確實有一定難度，他說：「我在戲中飾演一個剛返內地工作的中港貨車司機，所以講普通話反而唔好太正。」

　　古仔更透露導演早有提及過，發音有差異是此角色的特色。而莫文蔚透露古仔等埋位時會問他們應如何發音。問到可有睇過古仔國內的車呔廣告？她笑說：「有啊！所以個角色好適合佢。」問到莫文蔚可有留意，有報道指馮德倫 跟徐若瑄 分手。莫文蔚說：「無睇到報道。(會致電關心嗎？)咁多年朋友，時不時都會通電話，他想講自然會講。」


.

崢崢風骨

如果唔係華叔,我唔會識得崢崢風骨呢四個字。

但係,一聽到崢崢風骨,就自然會諗起華叔,根本諗唔到仲有乜野人擔得起呢四個字。

除左崢崢風骨,仲有民主,仲有六四...

平野有好叮噹法寶系列-- Formula 10.0.6

人總有一個奇怪的心態,就是平野無好,這個很陰謀論的想法,在女人身上就更能夠彰顯出來: 唏,你用料差沒廣告不是大牌子好唔掂,才會收得這麼便宜,否則早就斷貨,有人爭才可以賣得高價錢啦!(通常還要很港女地多加一句: 經濟學的供求問題丫嘛,乜你唔識咩?!)

嗯...無疑這個想法是令人十分有安全感,如果搽爛面,大可以唱通街--嘩,呢隻野賣晒廣告搵晒明星做代言人都咁樣,唱衰佢先。okok...唱還唱,是否貴野搽爛面就會抵D?!平野搽爛面,就是自己攞嚟賤?!

既然兩隻都有機會搽爛塊面,何不試試又平又過癮的新東西? 有意外收穫更有成功感啦! 如果無效,用來搽手搽腳也很爽呀! (敗完家回來當然口響響)

先說右邊綠色那瓶潔面爽膚水,是從素顏天使那邊看到介紹文才去買的,介紹和用的沒差,果然是有好強的潔膚效果,抹一下面整塊化妝棉都變得灰灰黑黑。比起廣源良的洋甘菊噴霧,它的香氣也沒有這麼強烈。反而所說的沒酒精成份也就不算了,因為打開蓋已經有一點點酒精的味道,第一次用下去還有少許刺刺的感覺,加上酒精有收緊毛孔的功效,相信沒酒精也不太可能吧。

左邊那支是深層清潔面膜,是我一併買的,沒有看過什麼介紹。只是因為用開的shiseido的mask早就用完了,用了那麼久都想換一換。根據指示塗上面上待10分鐘就可洗去,一塗上去覺得有點刺刺的,之後有一點點繃緊,待10分鐘洗完面後就勁咯~!效果和shiseido沒差,很好很好,那只是1/3的價錢而已,購買又方便,稍大一點的萬寧就有售。

對於比較喜歡出外做facial的人,又或者寧願花錢在外頭做facial的,自家用的就不用那麼貴了,對不? 重點還是價錢又平功效又不俗的,比起花大錢買貴價貨來得開心。

簡單而隆重

在facebook上發現的,以前我們不過是說笑,在麥當勞擺酒真是又抵又快。

現在願望成真,你會做嗎?

難怪現在的婚姻愈來愈脆弱。

因為大家都不明白,隆重背後的意義了。

潛水後回來

原來足足潛了水兩個多月。

我不是知名blogger,潛了水,也沒有太多人發覺。只是有幾個朋友,從blog認識的,由寫xanga開始到現在也同行,也就send一兩個email來問候。

其實也不是什麼大事情,只是開學了,現在我是教育學院的學生,唸SEN,希望學有所成之後,可以轉行教書。

另外,賣了樓也買了樓,即是賺了錢又迅即花了出去,來回一場空。星期五就收樓了,暫時離開我最愛的屯門區,希望兩年後,即是畢業後,也即是轉工後,會再回來然後買返同一個屋苑的大單位。

啤啤和喵喵也大隻得多,都是一歲的貓了,長大了是不是該成家立室? 應該把他們的相寄給李嘉誠三粒男孫的貓嗎? 博個機會和豪門攀親戚也好。

希望他們的貓懂得check email,那麼我就可以慳了那$1.4郵費。

大手入貨

當然不是講股票或其他投資啦!以我的資質,最多只能講一講敗家之道啦!

平時沒有final sale我是絕對不會入b+ab買衫,因為以質地與價錢,實在太不相稱。但減價又不同講法啦!平時賣$200多的普通長tee,在四折加上買三件有八折的情況下,突然變得抵過旺中,是否買得落手,只在乎有沒有size!!!

根據幾個星期下來的經驗,以荃錦中心和屯門市廣場的尺碼最齊,其他旺區真的想也不用想。而荃錦中心更加是最勤力的,數次路過都見店內整整齊齊,而不是一堆堆爛布在堆填區的樣子。

題外話一則,沙田的Zara真的生人勿近,Sales姐姐黑面程度如剛剛被人騙財騙色,十問九唔應之餘又極無禮貌。不過心底裡也十分同情他們,如果是我每天要對著一大群拖著篋橫衝直撞,拿廿件衫去試試完又不會拿返出來,還賴低自己個仔在店內亂跑亂叫的自由行同胞們,我一定可能會拿起家中所有孖人牌的利刀劈死他們。

香蕉蛋糕

放假著實太閒,加上買了數條半生不熟食又嫌酸的香蕉,於是把心一橫狠施辣手把它們輾碎來造蛋糕。

材料:
低筋麵粉 120g
砂糖          75g
牛油         100g
蛋              2隻
發粉(泡打粉) 1/4茶匙
梳打粉           1/2茶匙
蕉(要壓成泥狀) 4條

做法:
*先預熱焗爐180度
1. 先將牛油和砂糖用打蛋器打至奶白色,高速打約6-7分鐘
2. 再將雞蛋逐隻拌入
3. 篩入麵粉、發粉、和梳打粉
4. 最後加入蕉泥(?!)
5. 大約焗30分鐘,用木筷子插入蛋糕,沒有黏上粉漿就完成了

超簡單的一個蛋糕,是中一時家政老師教的,連唸master的notes也拿去回收賣錢了,也保留中一家政科的食譜,我這人也真夠騎呢...

決定

失蹤了這麼久,不是因為我有了bb,更加不是有其他喜事
而是掙扎著,究竟無言以對的情況,要幾時才可以結束?
好像一開始,根本就是錯誤...

原地踏步vs行差踏錯

人生總有很多原地踏步的時刻,但也有很多行差踏錯的陷阱。

最經典莫過於男士有感與太太感情轉淡,結果在外結識了小三,豈料溫柔鄉未享完,卻惹得性病被捉黃腳雞等等一身蟻。

社會進步,女士的地位和財富日益增加,也造就了更多願意當小三的男人。不過女人最擅長就是反轉豬肚,而男人通常又貪得無厭,結果納稅人每天也枉花冤枉錢為這些令人哭笑不得的情色糾紛下定奪。

女人(富婆?!)情到濃時,可以應承讓你享盡齊人福,你結婚我就當秘密情人,你要挖洞我就給你找塊地,你要開公司我就打本,你要拍裸照我還擺好甫士等你慢慢來。

情到濃時,可以濃到幾時?!這才是重點囉。

集體回憶Pizza Hut

對於Pizza Hut的回憶，我有許多許多。

小時候，爸爸帶我去山東街那家Pizza Hut(現址為黃家沙)，那是最近大角咀的一間，Pizza Hut的樓下,有麥當當。麥當當是每星期一天的節目,因為爸爸還是打工仔,每星期必有一天放假,那是好遠好遠的事了。

偶然,通常是因為有朋友來訪,我們都會吃Pizza Hut。那時,我最愛吃pizza上的肉碎粒,趁他們未看見時,會搶一粒擺入口。那時,沒有芝心批,我最憎就是吃那塊硬過我條命的批邊。媽媽多數會叫我們把批邊都給她吃,而她就用批心來跟我們交換。(直至現在去飲茶也是,吃蝦餃,也是吃了餃皮,就把蝦給我們吃)

那時,我的人間天堂,就是Pizza Hut,因為有我最愛的超級至尊和香蒜肉絲(粒?!)意粉。

長大了,世間美好事物一一湧現,雜亂紛陳。吃過太多太多pizza,跟風跟著批評誰比誰好吃,彷彿懂得批評最慣常普通的事物,就是品味的表現。

可是心底裡,總是知道,最好吃的pizza,就是小時候,一年那兩三次,最期待的超級至尊。

因為期待,永遠是最美麗。

爸爸媽媽的愛,永遠是最寶貴。

***

打完波(對,最近康復進展良好,開始做運動),想不起吃什麼,就打算去pizza hut探探我的老朋友。看餐牌時,突然醒起最近多位著名blogger的介紹,有個大蝦意粉實在不錯,於是就點了一個。既然吃不了香蒜肉絲意粉,pizza也就改吃夏威夷風情。

大蝦意粉上的大蝦不太大,也算爽口,但蝦味實在有點削。我知道這沒法和白灼基圍蝦相比,但以$56的價錢去衡量,蝦的味道和數量,也實在有點不值了。

意粉則沒有香蒜肉絲意粉般乾身,甚至有點油,味道更加像撈了豉油(!!!)有點怪。

Pizza沒什麼特別,只要新鮮熱辣焗出來的,就不會難吃到哪裡。

值得一提的,是屯門華都那間Pizza Hut的waitress服務態度實在一流,要水有水,要位有位,要笑容有笑容,就算要你等,也極有禮貌。

下次,下次我會再來探我的老朋友,什麼也不能令我變心!!!