給我最愛的babybear 2

babybear,

不知你在做什麼呢? 游水還是玩手指?

最近很多成年人都好瘋狂地用電話打咭,他們平時對打咭這個制度是深惡痛絕的--不過只限於返工。現在他們愛上的,只是facebook內的打咭遊戲,目的只為讓朋友知道,自己身在何方,做些什麼。再深一層的目的,恐怕就是讓人羨慕或妒忌一下--你在上班嗎? 我在high tea/蛇王/去旅行/訓晏覺...

對於這種近跡露體狂的行為,媽媽實在不希望你會做。我會十分願意你跟我分享生活細節,但如果你長大後,每小時也致電給我,我想我一定會改電話去避你。因為你爸爸每天從來都不會在無事問的情況下打超過三個電話給我,所以你都不要期望,我會因為你而改變哦。因為媽媽不會相信,掌握你的行蹤就等於關心你,那極其量只是操控,而你也會有反感的一天。熱面孔貼冷屁股是很難堪的,你媽面皮很薄,所以寧願在你有需要時才出手,也好過事事管。

祝 珍惜自由,不要無什麼就想要什麼

mothercat

大肚之謎

大肚婆有好多野唔做得唔食得,個個人都言之鑿鑿好有道理咁,但可信性究竟有幾高呢?

1. 未過三個月唔講得畀人知

***但講得畀老細知,老細又會將未來既工作安排畀其他人做,除非其他人係傻仔又或者老細寧願犯法都堅持要呢段期間炒你je,否則咪一樣會通晒天,你唔講都唔得啦!

***仲有wo,人係指邊個先?父母老爺奶奶果d又算唔算?唔當佢地係人又驚畀雷劈,當佢地係人又會違反呢個原則,咁究竟講唔講得呢?

2. 唔食得羊同蛇,魚生,咖哩

***咁蒙古人、日本人、泰國人同印度人點算?

3. 唔可以去飲或者出席其他喜慶場合

***做白事就話怕傷心過度je,紅事都唔得?!驚開心得滯呀?!

做人難,做大肚婆仲難,仲要捱多一個月先可以通天呀...點算...

難教

頑皮到極點的小朋友會做什麼?
打同學?講是非?整蠱人?
那是好久好久以前的事了。

現在的小朋友,不是最大的大壞蛋,但也會
打父母,上網唱衰人,虐打小動物,精神虐待同學,甚至在班房和異性做出不雅行為
有幾不雅? 連我這個結了婚的C9也說不出口

唉~
仲生仔?!
真係諗下先...

Honeymooners in Samui & Bangkok - day1 - hotel

用了一星期籌備的honeymoon,終於可以出發。因為早上6:15要check in,所以前一晚就到東涌的家睡覺。6:20才到達機場,拿拿臨跑上去,發覺原來OX條龍長過輪米。排到6:45終於可以check in,空姐說7:45就要去到Gate 50,所以又拿拿臨去burger king吃個早餐,那個早餐堅難食,衰過大快活。

今次沒上當,結果我們8:00才去到Gate 50,不出所料,根本又係一條輪米龍,等到8:10才上到機。

不過OX今早的確準時關機門起飛喎,正當我心中暗喜之際,旁邊坐著一個極無禮貌的細路,不斷著衫除衫跌匙羹執匙羹,然後講「二嬸幫我拎住」接著就在有限的空間擰來擰去,當我一句得埋去「小朋友唔該你自己拎住件衫同埋唔好咁嘈」,那個以為一家人坐飛機係好威的6人家庭當堂即刻靜晒,隔了一會細路還調了位去避我這個惡婆,我就繼續順利訓覺。

10:40準時降落至曼谷機場,因為bear之前在不敵我理據我情況下買了一個紫色大喼,正正因為顏色特別又大件,所以好快就認到自己的行李去轉機。

蘇梅個機場好似成間度假屋咁,比起世界各地懶係hi tech但感覺冷冰冰的機場,淨係望住都開心。

一出機場,就有個收費表,話你知去哪個沙灘就收幾多錢。望下張地圖,以為個scale有問題,點知落車果時,先知係的士收費有問題。在香港不用跳錶的路程,蘇梅就盛惠400銖,即係港紙1舊水。

間酒店係專業旅運幫我揀,當一入到酒店範圍,真係嚇左一跳,好鬼破爛,又有些類似大陸小村入面的髮廊(?!)和邪骨,爛路之餘還生滿雜草,再加多條超長斜路,古古怪怪的。但入到酒店大門,又ok喎,望住沙灘感覺都幾relax(後來才知原來蘇梅沒一間酒店不是望住沙灘,低能)。

另外,這間酒店極之奇怪,就是在客人來check in後,他們才開始收拾房間的。那時我已經攰爆,加上朝早上機沒有戴con,所以立即戴上眼鏡在guest room躺著看風景。

入到睡房,看到酒店刻意安排給honeymooners的花瓣,現實的我,拍了照已經急不及待在浴缸放滿水,把花瓣都拋進去(!!!)來個花瓣浴。不過泰國的浴缸比香港的酒店實在污糟得多,蘇梅更加是比深圳的更差,應該是很久都沒有擦過浴缸吧。

無知最快樂

今晚和bear一同去屯廣的順德河鮮食飯,他恨吃了好久喇(其實全部有魚游游下的餐館他都喜歡),碰巧今晚被朋友放了飛機又沒有買餸,就去大吃一頓了。

坐下來,我們順利成為全餐館最年輕的食客(我是80後呀!)感覺像去了跳茶舞...望著餐牌,連對(金)魚素有研究的bear也搞不清什麼是魽魚和黃骨魚。最後還是要問部長叔叔介紹,部長叔叔看著我們兩條大鄉里,然後用非常pro的眼神和語氣,替我們作決定要一條馬面骨(!!!!!!!!)

望著pro得很的部長,我立即問了很多比無知更無知的問題,例如為什麼蒸魚要斬到條魚一碌碌而不是原條蒸、為什麼用豉椒蒜頭蒸會比欖菜蒸好,也用了很多低能的語氣去盛讚條魚十分滑極之好食無得頂之類。部長叔叔流露著一副非常安慰和驕傲的表情,最後賞了我們一碟紅棗糕和免了茶錢。

男人,果然最喜歡女人(扮)無知。

不過這次他卻遇對了人,因為我真的很無知XDDDDD

無聊情話

話說在蘇梅島時見到一個男人一路賣啤酒一路唱歌,
於是我稱之為"beer哥"
而家久唔久,例如想bear做野時,就會叫佢"bear哥"
最近我經常同bear哥講beer哥,
"我想紅杏出牆去跟beer哥"
"你唔好阻住我,我要去搵beer哥"
"beer哥靚仔過bear哥"(要好快咁讀,唔好讀錯字XDDDD)

***

自從林峰開演唱會之後,我地成日拎佢黎開玩笑
特別係佢個演唱會叫做LET GET WET
bear將個名譯"讓佢濕"XDDDDD
今朝聽到話佢既CD係全港最賣得,嚇左一跳
諗緊佢下一次演唱會係咩主題
LET GET DRY"讓佢乾"?!
LET GET FIRE"讓佢火"?!
仲有佢上次個演唱會係咁淋濕自己個身,
再開既話,會唔會淋滾油?!
嘉賓將會係吳剛師傅XDDDDDDD

黑仔honeymoon

這幾天都身在蘇梅島+曼谷度蜜月,其實這次蜜月旅行好hea,預算4月1日去旅行,2月才走去book酒店機票,3月中才買本旅遊書看看有什麼東西可以玩。不過即使計劃得如何周詳,相信也敵不過他們。

這群紅衫軍堵塞了整個曼谷市中心,所有大商場都關門了,朋友托我買蝴蝶袋和boots都未買到,好彩在蘇梅島時買了少許boots作旅程中沖涼洗頭用。

幸好還有夜市可以逛逛,日頭就在泳池游水曬太陽,我而家真係黑過賓姐,連bear都好似碼頭咕喱咁,可以組團去非洲唱歌。

肥的瘦不了, 肥到不得了

早前保險經紀約我review份保單,剛好今天已經行得走得,又出開去睇跌打,於是去了荃灣。這位保險先生其實是我ex的舊同事(潘師奶的ex也真夠多=.="),以前經常出來玩,他的確是一個很有heart的保險人,會sell,但不是hard sell,不過真的會不厭其煩讓你知道,保險對人是有多重要...

保險對人有多重要在此不贅,只是近來有一個新發現,就是再見幾年沒見的朋友呢,大家多數都從前富泰得多,為什麼呢?!是香港愈來愈多好野食,還是人大了新陳代謝真的會立即慢下來?!

不過不要有口話人無口話自己了,其實真正肥得不得了的人是我和老公。結婚後他肥了廿磅我也肥了六磅,結婚前減的十磅很快就會回來我身邊。

***

題外話,近來荃灣人氣火鍋「大鍋口」很誇張,最天遲過5pm打電話去book位都是full booking,但今晚試過,真的不外如是,言過其實...

質素和屯門天悅差不多,價錢差得遠,人家平得多,也豪得多。至少天悅$78任飲任食包加一,汽水是可口可樂,雪碧,菊花蜜那些。

牛切肥牛 -- 並不是肥牛,一點肥也沒有,但又不是鮮牛肉,一點牛味也沒有

丸類 -- 不大有期望,但也不要未解凍連雪一起上吧?!

菜類 -- 沒有白菜、生菜、菠菜、通菜、小棠菜 (我們7pm去到都沒有這些菜,9:30之後那些食客吃什麼?!)

服務 -- 沒有菜唔聲唔聲,直至猛落單都見唔到一塊葉,再三追問之下才知沒有菜吃=.="

肥在這些店子裡,真有點對不起逐漸老去quota不多的自己。

而且還要$128未計加一,對於精於打斧頭的師奶來說,實在不值一來。

碌落樓梯上集

幾日無蒲頭,因為星期一下午,我在學校的樓梯踩到了一氹水,已穿了cons的右腳一滑,滑了4級樓梯,patpat落地戥落樓梯。

校工姐姐打算從後扶起我,因為太痛實在未能即時企起,我痛得咬著自己的手指時她還跟我說「個地真係好跣呀,今朝拖左好多次喇,滴晒水真係好濕呀,真係無辦法喇,我地都拖得好密架喇...(下刪百字)..你痛唔痛呀?」(我已經唔想理佢,佢把聲又吱吱喳喳,我又鬼死咁痛,我唔係校長,總之我跌唔死都使唔同我交代咁多野,你搵人黎好過啦)

我惟有即時跟她說不要緊,然後請她找其他人來...

最先來到的是PE老師,她摸一摸我發燙的腰骨,已經說要送院。其他同事陸陸續續或經過或看望,反應不一神情各異,多數人都問痛唔痛(咁跌法你話痛唔痛?),另外還加多句「個地真係好濕」(唔濕又點會跌丫),女副校長更離奇「HUH?跌倒呀?哎呀個地真係要搵人拖下佢先得」完全唔關佢事咁(要有人跌先搵人拖)

於是校長報警將我送進拿打素,我看到等候時間要4小時,我已經想暈,結果好準時地等左3個半鐘,醫生都係決定要我入院。

下集待續

木槺布甸

朋友上來打牌時,買來了美心甜品作手信,看到那杯細細的,又可以循環再用,於是就做了這個木槺布甸喇~

材料:(可做3杯)

瑪莉餅   12塊

忌廉       200mL

煉奶       50g

做法:

1. 將餅壓成碎

2. 將忌廉+煉奶打至雪糕溶化狀

3. 隔層將餅碎和忌廉倒進杯中

4. 放入雪櫃4小時,食得!

簡簡單單的甜品,出去吃可以好便宜,也可以好貴,自己做成本約$10/杯(如果全部材料都在百佳買),都幾貴。

好人好事

跛足了一星期,除了痛和趷趷下之外,所遇的好人好事也不少:

@樓下保安叔叔平時cool得很,但見到傷殘人士會主動撲去開門,還會叫我小心;反而平時好好口的看更阿嬸,依舊得把口打招呼但死都不肯伸出援手。(這個阿嬸好爆,過年時會按停部lift等你出平台給她利是!!!)

@小巴哥哥平時一身粗獷打扮,但原來非常細心。他會把車停到我面前(當時我拿著行山仗),上車後會待我坐下才問坐好未,先再開車。

@校長知我腳筋發炎後,叮囑我不要吃草菇和冬菇。(不過這些我平時也沒有吃)不過多疑的我,總覺得今次病假後,我會被炒...

@同事除了在facebook上問候我之外,有些平時很少傾計的同事,竟然會打電話給我,問有沒有工作需要幫手。雖然沒有,但我依然好感動。

@還有我在屯門的舊學生,竟然將探病包裝成課外活動,還在facebook上廣邀舊同事出席(?!)

@最後當然是大潘啤啤,原來我老公去到緊急關頭時,都幾體貼。

不過,我寧願早點返工...希望可以頂得住企幾小時,或者用繃帶紮著會好一點?!

低能對話

潘啤: 睇住後面呀
PC9: 我對眼生o係前面,點樣睇住後面?!

潘啤: 幾時同潘啤啤沖涼?
PC9: 而家咁涼,仲要同佢沖涼?!
潘啤: 關事咩?
PC9: 唔關

大豬腳

星期二一起身隻腳腫左,無名腫毒,因為無扭親無蚊針無撞過無打交。

著左3日拖鞋返工,我已經感覺到高層望住我對鞋既眼光不太友善。

我唔想請假,但我每日放工返到屋企,隻腳係痛到郁唔到,連腳趾都唔郁得,希望訓醒一覺會好D啦~!

但而家痛到唔想訓,點算?!
 
仲有,我親愛既老公,竟然問我出唔出去散步?! 究竟佢係咪有病?!
 
好彩之後都良心發現...

買糖水返黎畀我食,不過引埋隻為食貓上黎。

PC9同你共慶歡樂年年~

新正頭,今年係成為C9後第一個年,所以好大堆頭又好忙咁預備一大堆賀年食品。(會唔會根本係自己想食,扮晒野又話過年要食賀年野,華麗園咪就係一大好例子囉)

因為過年前太忙,連全盒都無時間買,結果年三十晚食團年飯前才買到個全盒。好彩之前醒目,問定阿媽拎瓜子,糖蓮子同埋大吉這些自己不吃但又一定要存在的東西,否則就更麻煩,人家都歲晚收爐了,在哪裡找得到呢?

話時話,這些年來,都學不懂吃瓜子,更不明白幾十蚊斤的瓜子有什麼好吃?連殼一齊吃的嗎?!

蘿蔔糕是自家弄的,總覺得那些只有胡椒粉味和一團粉的所謂蘿蔔糕,是應該在大X樂或大X活之類的快餐店吃早餐時才會吃到,而不會在家中出現。情況就好像你不會在家見到有女人在眼皮上黏著一條蜈蚣,然後塗藍色眼影走來走去一樣,因為這些人,只會在尖咀的大X豪附近才見到嘛~(夠了喇PC9你的九唔搭八!!!)

發神經地年廿二就去買華麗園,食到今天還在吃,但身懷大量椰汁的它到現在依然未變壞,嗯...看來它的防腐劑實在拍得住法老王...而且極之大件wor...像我們這些唔黐家又獨家村的兩公婆,分分鐘要食到年宵wor...仲要一日起碼有一餐都食先得,有人可以救救我嗎?!

還是下年買一底和阿媽對分?!

不如下年什麼都不要買,去避年算了~