努力讀書為明天

嗯嗯...我又要讀書了~
今次係想轉行,不過條路好漫長,唔知走到幾時。

揹鑊

舊同事正在揹緊近日爆發的大鑊。

不便打擾,將心比己假如隻鑊在我身上爆,我也不希望有三姑六婆打電話來名義上問候實際上收風,然後是非當人情地出去繪聲繪影地宣揚。

但藉此事,想起往事一椿,原來世界上確有人以為自己是超人,打著替天行道的旗號,對自己不順眼或阻撓自己上位的異己,心狠手辣地乜都做得出。

早在該區工作時,有case向我訴說被屈,因為校長想踢他出校,但他未夠年齡,家長又不願意,加上又沒有做過什麼犯法事情,只是小朋友偷懶唔返學唔交功課返學校傻仔扮大佬而已。結果是校長call齊警民關係科,又去報案室報案,指責曾經"""""""""見過""""""""""有人在學校踢人入會。

case是否有做過不得而知,我只知該校長的神經反應系統出現問題,拖了這麼久,才去做一些常人會立即做的事情,例如報警。

就如今次慘劇發生一樣,第一時間做的,也是拖,而不是交待和善後。

果然,這個世界,做事不合常理的人,實在太多。

難教

頑皮到極點的小朋友會做什麼?
打同學?講是非?整蠱人?
那是好久好久以前的事了。

現在的小朋友,不是最大的大壞蛋,但也會
打父母,上網唱衰人,虐打小動物,精神虐待同學,甚至在班房和異性做出不雅行為
有幾不雅? 連我這個結了婚的C9也說不出口

唉~
仲生仔?!
真係諗下先...

勁呀!

最近同事間流傳一個好爆的話題,就是這個批評試場老師講英文的港女。 都唔知邊個煽到佢咁甘,日日讚佢英文好,搞到以為自己叻過鬼妹。好快就有人出來平反,相信都應該係什麼什麼補習天后之類吧! 話時話,老師也不是全能,監考英文科的也不一定是英文老師喎。好彩下星期監考,唔會要我講核突英文,噓~

碌落樓梯上集

幾日無蒲頭,因為星期一下午,我在學校的樓梯踩到了一氹水,已穿了cons的右腳一滑,滑了4級樓梯,patpat落地戥落樓梯。

校工姐姐打算從後扶起我,因為太痛實在未能即時企起,我痛得咬著自己的手指時她還跟我說「個地真係好跣呀,今朝拖左好多次喇,滴晒水真係好濕呀,真係無辦法喇,我地都拖得好密架喇...(下刪百字)..你痛唔痛呀?」(我已經唔想理佢,佢把聲又吱吱喳喳,我又鬼死咁痛,我唔係校長,總之我跌唔死都使唔同我交代咁多野,你搵人黎好過啦)

我惟有即時跟她說不要緊,然後請她找其他人來...

最先來到的是PE老師,她摸一摸我發燙的腰骨,已經說要送院。其他同事陸陸續續或經過或看望,反應不一神情各異,多數人都問痛唔痛(咁跌法你話痛唔痛?),另外還加多句「個地真係好濕」(唔濕又點會跌丫),女副校長更離奇「HUH?跌倒呀?哎呀個地真係要搵人拖下佢先得」完全唔關佢事咁(要有人跌先搵人拖)

於是校長報警將我送進拿打素,我看到等候時間要4小時,我已經想暈,結果好準時地等左3個半鐘,醫生都係決定要我入院。

下集待續

姊弟戀

近來學生之間有很多姊弟戀,最誇張的,是中一和中五學生拍拖。

不得不找來相熟的學生問問,不怕被人笑嗎?自己的弟弟和男朋友的年紀一樣,甚至更細,溝通得來嗎?

原來現在的女生也很懂得享受,她們已經不再追求長久,不同以前我們還低低BB的想著現在拍拖將來會結婚,枉自己看了這麼多亦舒還不懂「愛是一個人,結婚生子又是另一個人」的道理。她們實在聰明得多哦!因為年紀比自己少的男生,除了很多是因為靚仔之外,還有是因為好玩和聽話,加上不說出來根本沒人知他們比自己年輕,因為那些小朋友實在長得很高大,不出聲真的和成人沒兩樣。(好恐怖,中一生得高大又靚仔,朝早無gel頭都係型仔一名,實在冧死女)

現在跟她們說「就快考會考不要拍拖啦」簡直是發神經,與其浪費口水倒不如直接跟她們說玩還玩,千萬不要玩出禍。現在男女都早熟,十二三歲已有生育能力,十六歲的媽媽已不罕有,但如果爸爸只有十二歲,恐怕早熟媽媽監都有得坐。

除了這班姐姐玩家不介意姊弟戀外,弟弟也有意外收獲喎!有人幫手做功課之餘,據他們說,姐姐比較成熟,不會亂發脾氣,加上又玩得(玩得當然是指攬攬錫錫,甚至進一步那種),實在比同齡的妹妹吸引。嗯~講到尾,最重要的應該是姐姐比妹妹看得開,甩身難度不會太高,加上大家在暗地裡都有共識--姊弟戀=拍散拖=易甩身。掂晒!

當大家都以為自己像單無雙和盧卡斯一樣幸運之時,一班中女為何還不向中學生學習一下?開心大過天呀,反正將來的事沒人知,計算那麼多,幹嗎?!

漏夜趕科場

的起心肝開始報SEN,其實由實習開始,已經有轉行打算,只不過自己懶,拖下一年拖下又一年,都無實際行動去實踐準備轉行的"大計"。

不過今年好了,因為有舊同事Agnese讀了一年,亦表明一定要踢我入去陪讀,所以老早就send了email來催我報,加上現在屋企有fax機,再加上入了學校做,應該會有人願意替我寫推薦信...等等這些"有利"因素,分分鐘今年有得讀書之餘,可能還要搬返出市區....諗起都好煩呀...吼))))))))))))))

其實我不喜歡讀書,讀完又如何?! 首先一定賺不回學費,又要犧牲時間(無得睇閒書事大呀),生仔大計更加要推遲(99同阿媽一定會更加發癲去催我),最重要是,我真係無心機讀書呀!這個才是最重的重點喎....唉~

等我仲想買部洪金寶返黎玩添...買左都無時間玩啦...蹝氣~

凱旋回歸

那個濕碎野奇多,但效果又真係奇大既中一camp已經搞掂去埋返黎得左。(拍手掌喇喂~~~~)

小朋友真係好可愛,但估唔到有咁多咁死要面既小朋友,其實佢地內裡都仲係一個可愛既小朋友,但因為實在太老積。(無辦法,都係迎合市場需要je,你睇萬寧妹妹幾受歡迎就知)
結果到左十二三歲,佢地既心態已經好似中年人咁執著要面小氣斤斤計較乜都齊。d阿爸阿媽仲以為阿仔好醒識計數唔會畀人蝦,實情係小朋友無晒童真,唔再可愛之餘,父母仲一定要保障自己,因為咁細個就識計數,大個又點會無條件地孝順你先?!

又要小朋友識計算,但又想佢地唔算自己,呢d父母既想法真係奇突兼低能。

用計數角度,搞呢d camp用咁多manpower同時間,實在好唔抵。但我既角度係救得一個得一個,去60個有1個成功,我已經當食左糊。何況今次係叫雙飛,真在令我好高興~

希望可以keep得住,唔好聽完就算。

題外話,我曬燶左,要日日返屋企倒模,加埋早上要化妝返工先可以見得人。但好可惜,我camp完除左呃1日病假(實在太攰又喉嚨痛呀)之外,每日都差唔多做到11:00先返到屋企,塞左d衫入洗衣機或者煲水第日飲之後,都已經要訓覺。所以我無時間理塊面喇,朝早化妝就得,黃面婆就係咁黎既~!

信守承諾

這幾天的心情完全像過山車一樣。

話說學校由前幾年開始,已經和一間領袖中心合作,期間看著中心的規模愈來愈大,學校可以book的時間也變得愈來愈少。但這間中心的負責人也很念舊,只要我們不是太趕急,它們都願意相就,總之就是維持著合作關係。

前陣子,中心的聯絡人跟我說,中心要賣盤了,原因是做得好,讓保良局看上了。我把這個消息告訴一眾輔導老師,他們都很替中心高興,因為負責人每次出camp都跟我們說好想快點退休,看來他的願望好快會實現。

由於他們要賣盤,所以中心暫時不能發invoice給我們。我也覺得大家認識了這麼久,就算暫時未簽invoice,他們也不會將檔期拿走吧?!

相信結果也不難猜,他們說了一大堆3日2夜的camp不包括第1天的早上、第1天的早上未book營在郊野公園很難開始等等的說話...結果就是希望我們知難而退吧?!

很失望呢...我忍不住告訴同事,也不住想辦法怎樣企硬和解決。但憑著信,第一次,卻變成這個結果,為什麼會這樣?在商業社會,是不是一定要白紙黑字才是信字所在?

或者只是我的天真。