好人好事

跛足了一星期,除了痛和趷趷下之外,所遇的好人好事也不少:

@樓下保安叔叔平時cool得很,但見到傷殘人士會主動撲去開門,還會叫我小心;反而平時好好口的看更阿嬸,依舊得把口打招呼但死都不肯伸出援手。(這個阿嬸好爆,過年時會按停部lift等你出平台給她利是!!!)

@小巴哥哥平時一身粗獷打扮,但原來非常細心。他會把車停到我面前(當時我拿著行山仗),上車後會待我坐下才問坐好未,先再開車。

@校長知我腳筋發炎後,叮囑我不要吃草菇和冬菇。(不過這些我平時也沒有吃)不過多疑的我,總覺得今次病假後,我會被炒...

@同事除了在facebook上問候我之外,有些平時很少傾計的同事,竟然會打電話給我,問有沒有工作需要幫手。雖然沒有,但我依然好感動。

@還有我在屯門的舊學生,竟然將探病包裝成課外活動,還在facebook上廣邀舊同事出席(?!)

@最後當然是大潘啤啤,原來我老公去到緊急關頭時,都幾體貼。

不過,我寧願早點返工...希望可以頂得住企幾小時,或者用繃帶紮著會好一點?!

姊弟戀

近來學生之間有很多姊弟戀,最誇張的,是中一和中五學生拍拖。

不得不找來相熟的學生問問,不怕被人笑嗎?自己的弟弟和男朋友的年紀一樣,甚至更細,溝通得來嗎?

原來現在的女生也很懂得享受,她們已經不再追求長久,不同以前我們還低低BB的想著現在拍拖將來會結婚,枉自己看了這麼多亦舒還不懂「愛是一個人,結婚生子又是另一個人」的道理。她們實在聰明得多哦!因為年紀比自己少的男生,除了很多是因為靚仔之外,還有是因為好玩和聽話,加上不說出來根本沒人知他們比自己年輕,因為那些小朋友實在長得很高大,不出聲真的和成人沒兩樣。(好恐怖,中一生得高大又靚仔,朝早無gel頭都係型仔一名,實在冧死女)

現在跟她們說「就快考會考不要拍拖啦」簡直是發神經,與其浪費口水倒不如直接跟她們說玩還玩,千萬不要玩出禍。現在男女都早熟,十二三歲已有生育能力,十六歲的媽媽已不罕有,但如果爸爸只有十二歲,恐怕早熟媽媽監都有得坐。

除了這班姐姐玩家不介意姊弟戀外,弟弟也有意外收獲喎!有人幫手做功課之餘,據他們說,姐姐比較成熟,不會亂發脾氣,加上又玩得(玩得當然是指攬攬錫錫,甚至進一步那種),實在比同齡的妹妹吸引。嗯~講到尾,最重要的應該是姐姐比妹妹看得開,甩身難度不會太高,加上大家在暗地裡都有共識--姊弟戀=拍散拖=易甩身。掂晒!

當大家都以為自己像單無雙和盧卡斯一樣幸運之時,一班中女為何還不向中學生學習一下?開心大過天呀,反正將來的事沒人知,計算那麼多,幹嗎?!

向天下的外星人致敬

我會像天下的媽媽一樣犀利嗎?!
如果把他們放在大企業,他們必定是出色的行政人員
如果把他們取代曾蔭權,他們打的工一定比那條廢柴更好
至少阿媽不會任人在家中燒炭XDDDDD

低能對話

潘啤: 睇住後面呀
PC9: 我對眼生o係前面,點樣睇住後面?!

潘啤: 幾時同潘啤啤沖涼?
PC9: 而家咁涼,仲要同佢沖涼?!
潘啤: 關事咩?
PC9: 唔關

又真係幾好wor

買呢幾支野果時,都無好大期望,只係覺得神仙水個concept用落頭髮係幾得意,加上成set野買有特價,就買左喇~

開初覺得好煩,加上洗得多,自然甩得多架啦。而家要過3次水喎,真係起碼洗次頭都無左一百幾廿條頭髮。

但好好彩,除左第一次洗之外,第二次開始,就真係甩少左好多頭髮,起碼唔再係成地都頭髮先。不過呢...如果要用晒4支野,每次沖涼加洗頭都要45分鐘,剩係個treatment mask又要扭乾頭髮又要等3分鐘都夠晒耐。

所以而家都係一星期先用個treatment mask同神仙水兩次,咪就係星期六日囉,平時就洗頭同用護髮素,咁樣都work wor!

用得過呀!!!真金白銀買架,唔係廣告黎架!!!

大豬腳

星期二一起身隻腳腫左,無名腫毒,因為無扭親無蚊針無撞過無打交。

著左3日拖鞋返工,我已經感覺到高層望住我對鞋既眼光不太友善。

我唔想請假,但我每日放工返到屋企,隻腳係痛到郁唔到,連腳趾都唔郁得,希望訓醒一覺會好D啦~!

但而家痛到唔想訓,點算?!
 
仲有,我親愛既老公,竟然問我出唔出去散步?! 究竟佢係咪有病?!
 
好彩之後都良心發現...

買糖水返黎畀我食,不過引埋隻為食貓上黎。

中女又如何

點解女人一定要有男人?就算果個男人係甩皮甩骨養你唔起唔氹你笑激到你喊,都要苦苦去追求?

我知實有人話,你嫁得出先講風涼話,但實情係,要嫁,都嫁畀一個你接受得到既人丫。而唔係「總之係男人就得」果啲你嫁左又要呻仲要自己都覺得好笨既「男人」。

同埋,只要你少女時期唔死,咁一定會變中女架啦。咁係咪知道自己將會變中女,就要一死謝罪?!

好佩服懂得放手既「中女」,但希望佢地既勇氣唔只試下同d甩皮甩骨拍拖,而係有勇氣美麗地好好生活下去。

兼且學會自處。