停工之日

停工偷懶無寫blog都個幾月,究竟有什麼做過呢?

*生日,收到一份頗貴重的生日禮物,貴重是在於因為我老公生性孤寒,但竟然願意如此大手筆,所以算係好貴啦! 同埋隻錶都真係幾重,又開始戴錶返工既生涯。

*婚後首個聖誕,無禮物,因為老公講明,隻錶太貴喇,所以已經當係生日+聖誕+新年既禮物。聖誕節去左消防局BB蕉,嘩~~~~已經好開心啦,過得咁特別又唔使諗節目,真係多謝教會既大隻靚仔消防弟兄。

*今年開始可以放聖誕長假,做學校社工原來咁爽,真係早知今日何必當初,一早入學校做校工算啦~

*聖誕假期理應係去honeymoon既好時節,但係兩公婆窮到燶,結婚果時根本無預到錢去honeymoon,所以要儲錢儲到復活節,仲要每人從私己錢中各自貢獻先去得成。今個月會去book機票酒店,唔使講,呢d野都係我去做。不過我都鐘意做呢d野,因為咁又學多d野喇,第時走佬都識窿路丫嘛~~XDDD

*煮飯愈來愈熟手,但間屋就愈來愈亂,而且唔介意畀人知,同事上黎屋企,我都係執好張檯就算。執檯過程發現左張恆生bill,唔記得交50幾蚊,但係罰我300幾,仲衰過大耳窿,想打去求情,個電話廿世都唔通/無人聽,打左無一個月都三個星期,都仲未打到。去銀行都無用,佢都係叫我打返上card centre,蹝氣。

*仲未買到個焗爐,個蛋糕班都就快完喇。我要焗爐好複雜,要求高過我揀老公,要有對流風同埋S型發熱線,仲要唔可以大過22L,因為要擺出窗台,畀隔離屋個怪人見到件龐然巨物,佢報警都似。

*終於到1月,1月尾至2月中,大家都唔使搵我,因為忙到飛天,我講真既~~~又係自作孽不可活既,將兩級既活動擺埋一齊搞,係咪低能呢?!

*掙扎轉行中,2月打算搏一搏去報IED既SEN,搏咋,唔一定得,得左都唔一定會做

*新一年,無乜大展望,細既就係唔好請咁多病假囉,即係先決條件要唔好咁多小病。同埋唔好再有咁多突發性既無謂支出,呢D野C9最驚架啦,仲衰過屋企既衰公有外遇...你話如果佢搵到個肯養埋我既外遇有幾咁好呢,係咪???? (又發癲...)