New York Bar & Cafe

長期講工作實在太悶,要學識下放鬆自己先(其實都無乜點緊張,多餘兼懶勁)

星期六黃昏放工,碰下運氣去左元朗New York Bar & Cafe

事前無訂位,因為電話打左兩日都打唔通。通常無訂位都唔會有位入,除非極好彩就會有露天檯坐,如果想坐入室內就諗都唔使諗。當日,就係極好彩囉,仲要好彩在有風唔落雨。

點set dinner就會有湯,無得揀,今日係蕃茄忌廉湯。平生最怕榴槤同一切酸野,簡直挑戰極限。幾好飲都係假,飲左幾啖就收工。

後面朱古力小姐真係堅正,奶味同朱古力味都返晒黎。惟一敗筆係冰太多,兼溶得太快,如果唔趁凍飲,就會變左飲冰水。

 

Set dinner入面既main dishes有得揀魚/T骨扒/牛柳,食呢個之前來個洋蔥圈($58)先,就係圖中所見咁大把,之前未食過,唔知原來得咁少,同埋應該炸左好一段時間,因為我地叫左之後,佢唔使5分鐘就到..一個字..頹。

 

主菜到,T骨扒($68)腍腍地,但無乜牛肉味+overcook,不過$68仲想點呢?係咪先?牛柳情況更離譜,相都費事影。

食物,並唔係呢間舖將來既死因,service先係。大家去睇下openrice就知。好彩佢唔收加一,否則死得更快。

service內容精選如下:

1. 唔該可以畀杯水我嗎? 得,等等 (結果係...無既..)

2. 麻煩你畀個沙律醬我丫~ 得,等等(結果係..畀左一兜cream)

3. 唔好意思,請問呢個係唔係沙律醬?  唔係呀,cream黎架。 (=.=")

4. 我想要沙律醬wo,可唔可以換?  可以,等等丫 (結果畀左一兜直徑細過一蚊銀既沙律醬)

5. (畀錢時),請問呢度係咪只收現金呀? 係呀。 (總數204,畀左210蚊) 無得找wo,有無4蚊?

=.="...